Багш нар тангарагтай болов

2009-2010 оны хичээлийн жилд Ховд аймгийн “Цаст-Алтай” цогцолбор сургуулийн багш нар аймагтаа анх удаа Багшийн тангарагтай боллоо.
“Хүүхдийг сурган хүмүүжүүлдэг багш нар тангараггүй байж яаж болох билээ. Багш нар тангарагтай болж, түүнийгээ мөрдөн ажиллаж, биелүүлж чадаагүй нь багшлах эрхээ цуцлуулах арга хэмжээ авдаг ёс зүйг тогтоох нь боловсролын салбарын хариуцлагын тогтолцоо бүрдэх нэг хэлбэр юм гэж үзэж байна. Энэ бодох л ёстой асуудал учраас манай хамт олон аймагтаа анх удаа багш нарын тангарагтай болж түүнийгээ сахин мөрдөхөө илэрхийлэн тангараг өргөсөн” гэж Ховд аймгийн “Цаст-Алтай” цогцолбор сургуулийн захирал Г.Мөнхжаргал ярилаа.
“Цаст-Алтай” цогцолбор сургуулийн багш нарын ТАНГАРАГ
Багш би
Оюун ухааныг эрхэмлэн, байнга суралцаж, өөрийгөө хөгжүүлнэ.
Багш би
Аливаад бүтээлчээр хандаж, өөрийн үүрэгт ажилдаа санаачилгатай байна.
Багш би
Багшийн ёс зүйг эрхэмлэн дээдэлж, бүхий л талаараа суралцагчиддаа үлгэр дуурайл үзүүлнэ.
Багш би
Нэг ч цагийн алдагдалгүй байж, ээлжит хичээлд чанартай, сургалтыг үр дүнтэй, өгөөжтэй зохион байгуулна.
Багш би
Өв тэгш хүмүүжил боловсролтой иргэн төлөвшүүлэхийн тулд өөрийн зүрх сэтгэлээ зориулан бүхий л хүч чадал, нөөц бололцоогоо дайчлан ажиллахаа тангараглая.