Монгол Улсын Батлан хамгаалах яам, Зэвсэгт хүчний жанжин штабаас Артиллерын цэргийн 90 жилийн ойн баярыг өчигдөр Офицеруудын ордонд тэмдэглэсэн юм. Ойн баярын арга хэмжээнд үе үеийн 400 гаруй артиллерчид буюу их буучид хүрэлцэн ирсэн байв. Эдгээр ахмад дайчдын гавьяа шагналыг үнэлж Монголын зэвсэгт хүчний жанжин штабын хүндэт жуух бичиг, бэлтгэл хурандаа цолоор шагналаа. Артиллерчидын алба 1921 оны гуравдугаар сарын 10-нд жанжин Д.Сүхбаатарын удирдлагаар байгуулагдаж байжээ. Тэд Зөвлөлт улсаас тусламж болгон өгсөн хээрийн их буугаар зэвсэглэж анхны дайралтаа хийж байсан түүхтэй аж. Хиагтад байрласан Хятад цэргийн хуаран руу галлаж, Монгол оронд ардын хувьсгал эхэлснийг анх зарлан тунхаглаж байсан байна. Тэгээд 1921 оны арваннэгдүгээр сарын 15-нд Ардын журамт цэргийн хоёр их буу, Богдын цэрэгт байгаа их буунуудыг нийлүүлэн их бууны анхны хороог байгуулжээ. Энэ өдрийг Монголын зэвсэгт хүчинд Артиллерын цэрэг үүсэн байгууллагдсан гэж үздэг байна.
